Në kuadër të Vitit Europian për Luftën Kundër Varfërisë dhe Përjashtimit Social, Qendra “Fëmijët Sot” në bashkëpunim me Qendrën e Informimit të Bashkimit Europian (EUIC) organizuan Konferencën “Varfëria dhe Fëmijët në Shqipëri”, ditën e martë, më 27 prill 2010, në ora 09.30 në ambientet e EUIC-së. Nëpërmjet vitit 2010 si “Viti Europian për Luftën kundër Varfërisë dhe Përjashtimit Social” Bashkimi Europian thekson rëndësinë e përgjegjësisë kolektive në luftën kundër varfërisë, në të cilën përfshihen pa dyshim vendimmarrësit, por edhe aktorë të tjerë nga sektori publik dhe ai privat. Një nga qëllimet e këtij Viti Europian është që t’i japë forcë zërit të atyre njerëzve në shoqëri që e përjetojnë varfërinë dhe përjashtimin social çdo ditë. Në këtë kuadër u organizua kjo konferencë, në të cilën u trajtuan kryesisht: - pasojat që shkakton varfëria në mirërritjen e fëmijëve, - si dhe në politikat shtetërore, nisma të tjera jo qeveritare dhe ndërkombëtare. Pjesë e kësaj konference ishte dhe prezantimi i studimit “Varfëria dhe Fëmijët në Shqipëri”. Në këtë studim, varfëria është trajtuar, së pari, si varfëria materiale, ekonomike, financiare, e lidhur me të mirat materiale të domosdoshme për të jetuar normalisht. Varfëria është parë, së dyti, si varfëria jo materiale, kulturore e lidhur me faktorë të tjerë me ndikim në cilësinë e jetës së njeriut, si; punësimi, papunësia, puna me pagë të vogël, arsimi, shëndeti, siguria njerëzore, etj. Në këtë konferencë morën pjesë përfaqësues nga institucione të ndryshme vendimmarrëse në vend, institucione politik-bërëse, organizata ndërkombëtare, si dhe nga organizma të ndryshëm vendorë (shtetërore ose jo shtetërore).